Tiwa Savage and her husband Teebillz know wetin dem dey do, Dem nor get any problem for their home or marriage.
The reason why i believe say all na drama be sey dem want attention rite now to sell Tiwa album, if u look very you go notice sey Tiwa don dey fade from the limelight ever since pipo like Seyi shay, Yemi Alade, Light begin shine.
E cum be like say Tiwa songs na noise, her management go dor notice say fans nor dey feel her like dat before again and Teebillz know how e dey go for the music business, bad rumors dey sell album for Nigeria, even for London and America na so e bi.
Dem nor get choice than to throw big stunt to get everybody attention and e don work but e never sure weather this attention wen dem dor get go help to sell Tiwa album, bi cus dem dor do album listening party still the street nor shake with her new songs like b4 wen she drop hits like ‘Kelekele, Love me, Eminado and the rest.
The truth wen dem suppose know sey time of every musician dey come and the time dey pass too.
When she reign she enjoy the spotlite so if dem notice sey she dor dey fade out from market no point to dey act film for the whole world, dey pretend as if say something dey happen wen nothing dey happen, Stunt na one way wen musicians take dey revive their dying career back to life, If u remember the time of 9ice he career don dey die but wen the tori cum sey he catch he wife with anoda man, the album wen he drop dat time cum sell all of a sudden but bad news nor survive am for long cus as he drop anoda 2in1 album na e we nor hear of 9ice again.
All the drama of Teebillz wan commit suicide for one bridge don too much and dem hack he account, Tiwa dey sleep around with men like Don Jazzy, 2Face na lie, if Teebillz know sey he love reach to die for the thing na personal choice.
All the drama, na stunt nothing more.
Songs wen Tiwa just release nor see light na even bi cus of this attention now wen dem dor get make one of the single ‘If I Start To Talk’, pipo begin wan listen to am to even hear wetin she dey talk about.
With their plan dem fit win and dem nor fit still win bi cus to blow nor bi how much you push, if na your time na your time but if your time don pass nothing u fit do to change am.
Make she ask pipo like Eldris, Ruggedman, Wande Coal,Qween, Mumagee, Soul T, Sasha, Mo’cheeda, 9ice, D’banj ,Timaya just to mention chekele pipo, Dem scatter area with their music one time too but now e bi like say dem nor reign any day.
Make we relax make we see how their drama go end last last.